چوخ زاماندیر قیزلاریمیزین فارسجا قونوشماسینی دوشونورم، چوخ اؤنملی بیر قونودور!!!

اوخول لاردا (مدرسه لرده) اوغلانلار فارسجا دانیشماغا اوتانارلار، قیزلار ایسه قازلانارلار!!! بو دانیلماز بیر دورومدور!!! آما نیه؟؟؟

من چوخ دوشوندوكتن سونرا بو سونوجا چاتمیشام!!!!

بیلدیگینیز كیمی، توركجه میزین 9 تانه سسلی سؤزجویو (حرفی) وار ə e ö ü i اینجه سسلی لر،u a o ı ایسه قالین سسلی لر دیلر، آما فارسجانین 6 سسلی سؤزجویو وار دیر، ə e o a i u(فارسجادا قالین یا اینجه سؤزو یوخدور)

گؤرونور توركجه نین سسلی لریندن 6 تانه سی فارسجادا دا واردیر!!! آما یانیلمایین (كیریخمایین- ایشتیباها دوشمه یین) توركجه نین سسلی لری بوتونلوكله قیسسا، آما فارسجانین سسلی لری اوزوندور، اؤرنك اوچون بیزیم دیلده A و فارس دیلینده اولان A بیر دئییل دیر. بیز سؤزلری قیسسا دئسك ده، فارسلار اوزادارلار!!! (همن كی شعرده "عروضی وزن" دئییلر!!!!)

سؤزو دانیشاركن اوزاداندا بیر جوره قیرجانماق ساییلا بیلر!!! و قیرجانماق قیزلار اوچون بیر یاخجی اخلاق ساییلر، یانی بیر قیزین قیرجانماغی اونا هونر ساییلیر، آما اوغلانلار قیرجانسالار عاییپ دیر.

ایندی مسئله میزین جوابی بئله دیر:

یازیق و سوچسوز قیزلار... اؤزللیكله بیزیم آزربایجانیمیزدا، چوخ آغیر بیر دوروم دا یاشاماقدادیلار!!! اونلار ایسته ییرلر ناز ائله سینلر، قیرجانسینلار، آما نئجه؟؟؟؟ البته هر بیر هونری اؤیرنمك اولار، گؤز گؤروب گؤتورر!!! آما كیمدن اؤیرنسین لر، اؤز باشاریقسیز آنالاریندان كی بئیین لرینه گیریب ناز ائتمك پیس دیر؟؟؟؟

بیلیرسینیز،  قیزلار فارسجا دانیشماغی تكجه بیر قاچاق یول كیمی اؤزلرینین ناز ائتمك لرینه سئچه بیلیرلر!!! چون توركجه دانیشاندا ناز ائله مه یی باشارمیرلار، كیمسه ده یوخدور كی اوندان اؤیرنه لر. توتاغین اؤیرندیلر ده، توركجه ناز ائدیب دانیشسالار، او ظالیم قارداشلاری اؤزلرینه بو حاققی وئررلر كی هئچ اولماسا باجیلارینی سوچ لو بیلسین لر. بیزیم قیزلاریمیز ناز ائتمك اوچون فارس دیلینه احتیاج لاری واردیر!!!

یاخجی، بو گئنیش دونیادا، تكجه آزربایجان لی لارین قیزلاری دئییل لر كی توركجه دانیشیرلار، یاخینلیقدا قوپ قوجا جمهوری آزربایجان وار، توركیه وار، اونلار بو پروبلمی نئجه چؤزوب لر( حل ائله ییب لر؟)؟؟؟ یوخسا اونلارین دا قیزلاری ناز ائتمك اوچون فارسجا دانیشارلار؟(یوخ یوخ)

ائیواز طاها بی لرینین  دیلیندن دئسم داها یاخجی اولار!!! اونلار توركجه لرین یوموشادیب لار، بیزیم كی قورو قالیب!!! یوموشاق دیلده هر بیر ایش گؤرمك اولار!!!

دیل نئجه یوموشانار؟؟؟

دیل اوخول لاردا اوخولسا، مئدیالاردا سسلن سه، قازتلرده یازیلارسا یوموشانار، یوخسا دیل آغیزدا قالسا، بازاردا قوللانسا  هله اوندان پیس، بیر آیری دیلین هجمه سینین آلتیندا قالسا، قورویار، گؤبودله شر، بو گؤبودلشن دیلده ناز ائتمك اولماز!!!!

ایندی بیلمیرم قیزلارین سؤزلری منه نئجه اولاجاقدیر!!!( البته گؤزله میرم، بیر قیز منیم بو گؤبود یازیلاریمی اوخوسون، اوخوسادا باش تاپسین، باش تاپسادا، منه جواب یازماغا حوصله سی اولسون، حوصله سی اولسادا، یازماغی باشارسین!!!!)

قیزلارین فارسجا دانیشماقدان خوشلاری گلدیك لرینه گؤره، دانیشگاها گئدركن، فارسجا دانیشماغا ماهانالاری اولور!!! و بول بول فارسجا دانیشیرلار، حتی ایش او یئره چاتیر كی، تورك اولدوقلارین دا دانیرلار!!! بئله بیر فیكیر ده ائشیتمیشم كی، تورك قیزلاری فارسجا دانیشیرلار كی تورك دیلینده اولان لهجه لرین گیزلتسین لر، یانی باخین

توتاغین بیر قیزآ آدیندا بیر كند دن چیخیب گلیپ تهراندا تحصیل آلسین، بو قیز آغزین آچیب دانیشماق همن، هانسی كندلی اولدوغو آیدینجا بللی اولاجاقدیر!!! بو قیز دا ایسته میر اؤزونو كندلی گؤسترسین( چون كندلی اولماق، یانی گئری اولماق، یانی مدنیت دن اوزاق اولماق، اؤزللیك له تربیزلی لرین فیكرینجه. تربیزلی لر ایسترسه لر بیرینی تحقیر ائتسین لر، اونو كندلی سسلرلر) یاخجی بورا كیمی بو فیكیر دوز گؤرونور!!! آمما تكجه كند قیزلاری دئییل، بو تربیزلی، اورمولو، اردبیل لی، زنگان لی، همدان لی، قزوین لی شهریندن اولان قیزلار نیه فارسجا دانیشیرلار؟؟؟؟؟ اونلار كی آغیزلارین آچیب دانیشسالار تئز بللی اولاجاق مثلا تربیزلی یا اورمولو یا قزوین لی یا اردبیل لی یا... دیلار، بونلار ندن قورخورلار، ندن نیگران دیلار كی فارسجا دانیشیرلار؟؟؟؟ گؤرونور بو فیكیر چوخ دا دوزگون دئییل دیر

قیزلارین فارسجا دانیشماق پروبلمی، روان شناسی پروبلمی ساییلمیر، چوخ قیز گرك قیرجانا (اوغلانی یولدان ائیلر، قیزین شیرین دیللری) آتا بابا سؤزلریمیزده ده بو مسئله یه ایشاره اولوبدور.

بو پروبلمی چؤزمك تكجه بوندان آسیلی دیر كی دیلیمیز یوموشانسین، گلین دیلیمیزی یوموشاداق، گلین هئچ اولماسا یازاق، یاراداق. دوروب كیمی گودوروك كی گلسین  دیلیمیزی یوموشاتسین؟؟؟

هر كس اؤزو بیر اوخول آچا بیلر، اؤیرنسین، اؤیرتسین، مثلا، بو یازی اؤزو بیر اوخول ساییلر، من ده بوردا اؤیرنیرم، بیری ده گلیب اوخویور ایرادلاریمی دئییر!!!

سیزده اوخول آچین، دیلیمیزی یوموشالدین!!!!

پنجشنبه 4 مهر 1392
بؤلوملر : مقاله لر,